張家輝搏殺冇年限
任達華40似BB

女人三十一支花,那麼……男人四十又如何?任達華與張家輝兩位已有家室、事業得意的男人,對男人四十看法不一,任達華認為四十歲的男士只是幼苗期,家輝則覺得該階段絕對是事業衝刺期……

張家輝:輝 任達華:華

華:你認為男人40歲會點?
輝:當我踏入30歲嗰年,我會諗「嘩!咁就30歲嘞!」都有啲驚,不過之後對我嚟講都只係一個數字遊戲,有人話男人40歲係事業衝刺期,但我就入行以嚟到依家都衝緊。
華:我就話男人40歲心智都未成熟,未有皺紋、又未夠男人味,應該話60歲先至係黃金時間,工作會有一定水平,家庭又穩定,知識又多,所以60歲先至係個開始,40歲只係BB。
輝:哈哈!男人同女人係完全唔同,不過見你依家都好好,貴為影帝,物業又遍布全球,最近做埋馬主添,真係令人羨慕。

更多其他火辣視頻

養細路要500萬
華:雖然話唔同年齡追求嘅嘢唔同,但對我嚟講就一樣,以前反而多咗虛榮,就因為咁就帶動到積極工作……到我依家呢個階段,我就享受緊生活,得閒影吓相,拍戲就係輕鬆啫!
輝:我呢啲仲喺度奮鬥緊,為個女努力賺奶粉錢,你知唔知養大一個細路真係要500萬㗎!
華:咁我又冇計算過,人生有高低潮,不過命運係自己掌握,機會亦都係睇你珍唔珍惜,我都算託賴,當年離開無綫後,發展都穩步上揚,人生就係咁。
輝:有邊個冇高低潮,我自己嘅歷程就似隻黑馬,本身唔係高大威猛靚仔,通常人吔都唔覺得我會跑出,所以自己好畀心機做,有啲嘢唔能夠控制就要接受。最唔開心係亞視年代,因為處於弱台少人睇,條路係比較難行,我有段時間覺得自己黐咗線,諗嘢會突然空白一片,個人怪怪地,好怕見人,又易發脾氣、失眠,就連諗嘢都偏埋一邊,成個精神病人咁。
唔信假戲情真
華:依家冇事咪得囉!其實我吔都幾似,有個女之餘,太太都喺呢個圈做,有冇擔心過?
輝:冇吖!都冇人溝我,啲人成日話假戲情真,邊會吖!溝女就溝女啦!咩抽離唔到啫,又唔見我抽唔到?就算戲入面愛死,一cut機就出返嚟啦!
華:緋聞咪就係咁出嚟囉!依家緋聞同人氣成正比嘅。
輝:唉!娛樂圈係娛樂大家嘛!睇開啲啦!
採訪:呂詠雯   攝影:沈健程

金像獎勁敵吳景滔
最近,家輝與華哥雙雙憑電影《黑社會以和為貴》入圍角逐今屆金像獎「最佳男配角」,兩人同視《父子》中的吳景滔(圓圖)為強勁對手,實力不容忽視。
輝:吳景滔呢位小朋友威脅性大㗎!因小朋友冇技巧,思想又唔複雜,叫佢做咩都好用心做,效果就自然會好。
華:佢個樣幾可愛,套戲角色好適合佢,導演譚家明功不可沒,完全係度身訂造咁,有獎係一個鼓勵。
輝:劉燁喺《滿城盡帶黃金甲》入面都處理得好好,聲線、演繹都發揮得唔錯。
華:呢部無疑係一部非常商業嘅電影,引起咁多話題係啱嘅,不過最後都要睇評審喜好嘅。咁你對自己有冇信心?
輝:講真,入圍對我嚟講都幾意外,因為我嘅戲份剪咗好多,剪咗嗰啲對個角色好重要,不過唔緊要,剪咗都能夠入圍,我就梗係開心啦!

湊女篇不准當明星
華:擔唔擔心個女曝光會對佢將來有影響?
輝:第一次帶個女出嚟有諗過,我覺得收埋佢,對佢成長會有影響,其實冇咩所謂,但唔會刻意,好似之前個舞台劇咁,係啱小朋友睇我咪會帶個女睇囉!
華:我吔拍戲日夜顛倒,基本上都好少時間照顧個女,冇辦法,惟有靠大女(琦琦)睇住,佢就辛苦啲,咪做少啲幕前工作,擺多啲時間喺家庭度,係就係唔捨得,選擇性做囉!
輝:大人要搵食就冇辦法,我吔就交畀一個信任嘅朋友照顧個女,都OK嘅,依家有咗個女,會時時刻刻都想飛返屋企同佢玩。
輝:真係咩最好都畀晒佢,第時到佢讀書,我唔想佢入傳統學校,因為見到依家啲小朋友讀書好大壓力,書包重到死,又多測驗考試,所以我會畀佢讀國際學校。
華:完全同意!我之前聽你講話唔想個女入行,我都係咁話,千祈唔好添,太辛苦,女仔人家日捱夜捱好易殘,我寧願佢開開心心過校園生活,學好國語啦,拍戲會冇咗個女㗎!
輝:哈哈!依家我個女都仲係牙牙學語階段,不過第一句講嘅並唔係「爸爸、媽媽」,反而係我屋企隻狗,點解?平時我喺屋企成日都同隻狗講:「德仔!你曳曳!」可能佢聽得我吔講多,突然有日就識講呢句說話,好盞鬼。