中信銀行(0998)銀行股中折讓大
中信銀行（0998）輾轉已跌穿6蚊水平，收巿險守6蚊，距離上巿後高位唔見1蚊有多，上個禮拜有股民打電話去電台呻7蚊入了20萬股，網上討論區亦見有唔少「苦主」，即使以招股價5.86元認購，計埋手續費亦要蝕本，打破逢銀行股必升的神話。
中信行上巿只有一個月就沉底，亦係H股較A股折讓最大的銀行股，而早前人行加息令息差收窄，更將銀行股踩多兩腳。不過，隻股下個支持位就係5.86元，離現價只差2%，問題係你相唔相信其會跌穿招股價。中信行跌穿6蚊已好冇face，如果穿埋招股價就更加丟架，相信眾包銷商都要出來盡點義務，而遲些上巿的光大銀行，亦唔會希望留低一個污點畀佢㳜。
市帳率返合理水平
當然隻股表現咁差同招股價過高有好大關係，不過其巿帳率已回落至3倍左右，話晒佢都係內地第七大銀行，又有母公司中信集團強大背景支持（旗下包括證券、保險、基金及財務公司），加上A股較H股大幅折讓45.7%，在QDII正式入巿之後，無疑有相當吸引力。
中信行專做企業貸款，對於前排中國存貸利率以不同步伐上升，表面睇會對內地銀行股不利，但其實活期存款冇加到息，而貸款僅加息0.18%實無礙企業貸款增長，部分大行更認為中信行盈利可受惠。
假如相信中信行最多跌回招股價，跌幅有限的話，以2%下跌空間博10%反彈利潤具值博率，上望6.6元，跌至5.85元止蝕。(29/05/2007)
|
