網球王子Ace波必定掂 26/02/2017 要數由體壇風雲人物升呢再做馬主，相信大家第一時間都會諗起體操王子李寧，剛周三谷戰有份上陣嘅「光速銀桂」，就係佢名下馬。不過，原來喺香港，都有一位職業運動員依家做埋馬主，講緊就係前香港首席男子網球手許建業（John）。 前香港網球王子許建業（右）早前在蘇偉賢（左）陪同下，睇愛駒「必定掂」試閘。 許建業喺十幾年前曾經打過職業賽，2001年仲試過拍住唐敏聰拎咗全運會男雙銅牌，雙打世界排名最高試過上到157位，球技有番咁上下o架！不過，喺香港做職業球員條路並唔易行，所以阿John喺2004年掛拍後就去從商，依家升呢同埋外父兼今年元旦獲香港浸會大學頒授「榮休教授」名銜嘅傅浩堅夾份養馬，都算轉型成功。 「必定掂」 許建業孖住外父做馬主 查實阿John同外父呢匹愛駒「必定掂」，初出就以99倍大冷身份跑第三，證明質素唔差，上次再跑谷草1000米形勢太差先至輸，今次轉跑田草1000米直路賽，莫雷拉肯繼續操刀，睇吓可唔可以喺頭場即整球Ace波，幫呢位前香港網球王子拉頭馬！